७ फागुन, जनकपुरधाम । शुक्रबार बिहान धनुषाको शहीदनगर नगरपालिका–५ का शंकर कापरका अढाइ वर्षीय छोरा कृष्ण पानी जमेको खाल्डोमा खसे । त्यहाँबाट निकालेर जनकपुर प्रादेशिक अस्पताल पुर्याउँदा भेन्टिलेटरमा राख्नुपर्ने भनियो । ‘डाक्टरले अवस्था गम्भीर छ, यहाँ भेन्टिलेटर खाली नभएकाले काव्य अस्पताल लैजानुस् भन्नुभयो,’ कापर भन्छन् ।

डाक्टरले निजी अस्पतालको नामै लिएर त्यहाँ लैजान भनेपछि आर्थिक रुपमा कमजोर उनी अप्ठ्यारोमा परे । आफन्तसँग सल्लाह गर्दा काव्यभन्दा जनकपुरकै भ्रमरपुरचोकमा रहेको स्वस्ती अस्पताल अलि सस्तो भनेर छोरालाई त्यतै दौडाए । र पनि, निकै ढिला भएछ, अस्पतालले साँझ ७ बजे बालकको मृत्यु भएको बताउँदै ५० हजार रुपैयाँको बिल थमाइदियो ।

‘पैसा नतिरी छोराको शव पनि नदिने भन्यो’, आँखाभरी आँशु पार्दै कापरले भने, ‘प्रादेशिक अस्पतालमै भेन्टिलेटर पाएको भए मेरो बेटा (छोरो) मर्ने थिएन ।’

मधेश स्वास्थ्य विज्ञान प्रतिष्ठान अन्तर्गतको प्रादेशिक अस्पतालमा आईसीयू बेड नपाउने शंकर एक्लो होइनन् ।