पाल्पा : शनिबार रातिदेखि अवरुद्ध सिद्धार्थ राजमार्ग एकतर्फी सुचारु भएको छ। झण्डै १३ घण्टापछि एकतर्फी खुलेको हो।

तानसेन-बुटवल सडकखण्डको तिनाउ गाउँपालिका-३ स्थित सिद्धार्थ राजमार्गअन्तर्गत  सिद्धबाबा नजिकै हेडबक्समा पहिरो खसेर राजमार्ग अवरुद्ध भएको जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक वीरेन्द्र थापाले बताए।

पहिरो गए राति करिब १० बजे खसेको हो। आइतबार बिहान साढे ११ बजे राजमार्ग एकतर्फी रूपमा सुचारु भएको छ। दुइवटा जेसिबिले पहिरो पन्छाउने काम भइरहेको छ।

पहिरो ठूलो खसेको हुँदा पूर्णरूपमा कतिबेला सुचारु हुन्छ भन्ने यकिन नभएको थापाले बताए। राजमार्ग अवरुद्ध भएपछि गए रातिदेखि सयौंको संख्यामा सवारी साधन बीच बाटोमा रोकिएका थिए।

कैयौं यात्रु गन्तव्यमा पुग्न नसकेर बीच  बाटोमै अलपत्र परेका थिए। एकतर्फी सुचारु भएपछि रोकिएका यात्रु गन्तव्यतर्फ जान पाएका छन्।