२१ साउन, काठमाडौं । दक्षिण अफ्रिकालाई २-० ले हराउँदै नेदरल्याण्ड्स महिला विश्वकप फुटबलको क्वार्टरफाइनलमा प्रवेश गरेको छ ।

नेदरल्याण्ड्सलाई क्वार्टरफाइनलमा पुर्‍याउन जिल रुडले नवौं तथा लिनेश बीरेन्स्टेनले ६८औं मिनेटमा गोल गरे

समूह चरणको अन्तिम खेलमा इटालीलाई पराजित गरेको भए पनि दक्षिण अफ्रिकाले नेदरल्याण्ड्सविरुद्ध त्यो प्रदर्शन दोहोर्‍याउन सकेन ।

नेदरल्याण्डसले अब अब स्पेनको सामना गर्ने छ । तर उसले अनुभवी मिडफिल्डर डेनियल भान डे डोङ्क बिना स्पेनको सामना गर्नुपर्नेछ । उनले प्रतियोगितामा लगातार दोस्रो पहेँलो कार्ड पाउँदै स्पेनसँगको खेल गुमाउने भएकी हुन् ।

स्वीट्जरल्याण्डलाई ५-१ ले पराजित गर्दै स्पेनले प्रिक्वार्टरफाइनलमा सानदार खेल प्रस्तुत गरेको थियो । तर त्यो प्रदर्शनबाट आफूहरु नडराएको नेदरल्याण्ड्सका प्रशिक्षक एन्ड्रिस जोन्करले बताएका छन् । उनले आफूहरु सबैलाई हराउन सक्छौं भन्ने विश्वासका साथ महिला विश्वकपमा आएको बताए ।