काठमाडौँ । स्वयम्भूस्थित स्नो मञ्जुश्री होस्टेलमा रहेका बालकहरूको परिवारमा पुनर्मिलन गराउन थालिएको छ । होस्टेलका सञ्चालक यौन दुर्व्यवहारको आरोपमा पक्राउ परेपछि त्यहाँ रहेका बालकहरूको परिवारमा पुनर्मिलन गराउन लागिएको हो ।

होस्टेलमा रहेका ५५ जना बालिकाको उद्धार गरी अस्थायी संरक्षण केन्द्रमा राखिएको छ । उनीहरूलाई मनोविमर्श, स्वास्थ्योपचार तथा पारिवारिक पुनर्मिलन लगायतका कार्य भइरहेको राष्ट्रिय बाल अधिकार परिषद्ले जनाएको छ ।

पारिवारिक लेखाजोखाको आधारमा आवश्यकताको आधारमा पारिवारिक पुनर्मिलन लगायतको संरक्षण तथा व्यवस्थापन गरिने कार्यहरू भइरहेको परिषद्का सूचना अधिकारी रामबहादुर चन्दले बताए ।
त्यहाँ रहेका बालकहरूको काठमाडौँ महानगरपालिका वडा नम्बर १५ को रोहबरमा विद्यालय प्रशासनले पारिवारिक पुनर्मिलन गराउन लागेको हो ।

साउन १० र १२ गते उक्त होस्टेलबाट ५५ जना बालिकाहरूको उद्धार गरिएको थियो । होस्टेल सञ्चालक सोनाम घ्याम्पे घलेले बालिकाहरूमाथि यौन दुर्व्यवहार गर्ने गरेको खुलेपछि त्यहाँ छापा मारिएको थियो । छापा हान्ने क्रममा त्यहाँ रहेका सबै बालिकाहरूको उद्धार गरिएको हो । भने त्यहाँ रहेका बालकहरूको पारिवारिक पुनर्मिलन गराउन गराउन थालिएको हो ।