जनकपुरधाम । डा. सीके राउत नेतृत्वको जनमत पार्टी सरकारमा सहभागी भएको छ । जनमत पार्टीकी समानुपातिक सांसद अनितादेवी साह संघीय सरकारको मन्त्रीमा नियुक्त भएकी हुन् । उनी गत वर्ष सम्पन्न स्थानीय तह निर्वाचनमा जनकपुरधाम उपमहानगरपालिकाको मेयरमा पराजित भएकी थिइन् ।

अनिताले संघीय मामिला तथा सामान्य प्रशासन मन्त्रालयको जिम्मेवारी पाएकी छन् ।

गत स्थानीय तहको निर्वाचनमा जनमत पार्टीबाट टिकट पाएर जनकपुरधाम उपमहानगरपालिकाको मेयर पदमा उम्मेदवार बनेकी उनले जम्मा १ हजार ४३७ मत प्राप्त गर्दै सातौँ स्थानमा सीमित भएकी थिइन् ।

संघीय संसद्मा अध्यक्ष राउतसहित जनमत पार्टीका ६ सांसद छन् । तर मेयरमा नराम्ररी पराजित भएर समानुपातिक कोटाबाट सांसद बनेकी अनितालाई नै पार्टीले किन सरकारमा पठायो भन्ने प्रस्ट भइसकेको छैन ।

गत स्थानीय तहको निर्वाचन अघि जनमत पार्टीमा प्रवेश गरेर सक्रिय राजनीतिमा लागेकी अनिता यसअघि गैरसरकारी संस्था र समाजसेवामा सक्रिय थिइन् ।