१० असार, काठमाडौं । एसीसी महिला टी २० च्याम्पियनसिप खेल्न मलेसिया पुगेको नेपाली राष्ट्रिय महिला क्रिकेट टिमको लक्ष्य थियो प्रतियोगिताको उपाधि जित्दै एसिया कपमा छनोट हुने ।

१० टोली सहभागि प्रतियोगितामा फाइनल पुग्ने दुई टिम टेष्ट राष्ट्रहरु सहभागी हुने एसिया कपमा छनोट हुने प्रावधान थियो । तर सेमिफाइनलबाट बाहिरिएपछि प्रतियोगिताको उपाधि जित्ने र एसिया कप खेल्ने नेपालको लक्ष्य पूरा हुन पाएन ।

यसअघि नेपालले २०१२ र २०१६ मा गरी दुई पटक टेष्ट राष्ट्रसहितको एसिया कप खेलिसकेको थियो । यस पटक भने टी २० च्याम्पियनसिप प्रतियोगिताबाट दुई टोली एसिया कपमा छनोट हुने व्यवस्था थियो ।

निर्णायक खेलमा प्रदर्शन भन्दा पनि वर्षा बाधक बन्दा नेपाल एसिया कपमा छनोट हुन सकेन । युएई विरुद्धको सेमिफाइनल खेल पूरा हुन नपाएपछि नेपाल अभागी बन्यो भने युएई भाग्यमानी ।

युएई समूह एमा चारै खेल जित्दै समूह विजेताको हैसियतमा सेमिफाइनल पुगेको थियो । समूहमा तीन खेलमा जित र एक खेलमा हारको नतिजासहित समूहमा दोस्रो भएर नेपाल सेमिफाइनल पुगेको थियो ।