२३ र २४ भदौको जेन–जी आन्दोलनपछि मंगलबार पहिलोपटक राष्ट्रपति कार्यालय शीतनिवासमा बसेको प्रधानमन्त्रीसहित शीर्षस्थ नेतृत्वबीचको बैठकमा केही रोचक दृश्य देखिए । खासगरी प्रधानमन्त्री सुशीला कार्की र एमाले अध्यक्ष केपी शर्मा ओलीबीच पछिल्लो केही समयता नोकझोँकको स्थिति थियो । त्यसैले २१ फागुनमा घोषित निर्वाचनमाथि देशले नै संशय गरिरह्यो । यही नोकझोँकलाई शान्त बनाउन राष्ट्रपति रामचन्द्र पौडेलले बोलाएको पहिलो बैठकमा यस्तै केही रोचक दृश्य देखिएका हुन् ।

शीतलनिवासले पहिले कांग्रेस सभापति शेरबहादुर देउवा, एमाले अध्यक्ष केपी शर्मा ओली र नेकपाका संयोजक पुष्पकमल दाहाल प्रचण्डबीच मात्रै छलफल हुने सूचना चुहाएको थियो । तर केहीबेरमा सुशीला कार्की पनि सहभागी हुने सूचना सञ्चारमाध्यमलाई उपलब्ध गराइयो । सूचना आएलगत्तै राष्ट्रपतिको अग्रसरतामा बस्न लागेको ओली, देउवा र प्रचण्डसहितको बैठकलाई लिएर सामाजिक सञ्जालमा खुलेरै टिप्पणी हुन बेर लागेन ।

निर्वाचन घोषणा गरेको सरकार र चुनावलाई लिएर प्रस्ट धारणा नबनाइसकेका पक्षबीचको पहिलो बैठकको समाचार आफैँमा चर्चायोग्य थियो । अपराह्न तीन बजेलाई बोलाइएको बैठक केही ढिलोगरी सुरु भयो । खासमा कुनै औपचारिक निर्णय गर्न सो बैठक बोलाइको थिएन । ‘हामी भेट्यौँ है’ भन्ने सन्देश मात्रै दिनु थियो । ढिलो गरी बसेको बैठकको फोटोले अपेक्षाअनुसारको चर्चा पायो । सर्वसाधारण, नेतादेखि सञ्चारकर्मीसम्मले खुलैर फोटोको अनेक अर्थका टिप्पणी गर्न भ्याए ।

सार्वजनिक रूपमै चुनावी वातावरण नभएको चर्चा छँदै थियो । यहीबीच राष्ट्रपति, प्रधानमन्त्री, देउवा, ओली र प्रचण्डलाई एउटै फ्रेमको तस्वीरमा देखिएपछि चर्चा थप चुलियो । २३ र २४ भदौ अघि र पछिको पक्ष एकै ठाउँमा बसेका थिए । अनि यसैलाई धेरैले अब देश चुनावी बाटोमा प्रवेश गरेको रूपमा अथ्र्याउन भुलेनन् । यही प्रतिकात्मक बैठकमा सुरुकै सिट प्लानदेखि उठ्ने बेलासम्मका दृश्य भने अलग थिए ।

राष्ट्रपति, प्रधानमन्त्री र प्रमुख दलनिकट स्रोतहरू अनुसार पहिलो र उच्चस्तरको बैठकमा तनावमा आउने गरी पेचिलो नोकझोँककै स्थिति भने भएको थिएन । बरु जिस्किँदै, कटाक्ष र ठट्टा गर्दै एउटै प्लेटमा खानेसम्मका घटना भएको स्रोतको भनाइ छ ।

‘दुई पक्षमात्रै बसेको भए नोकझोँक तनावको स्थिति हुन्थ्यो होला । तर राष्ट्रपति, प्रधानमन्त्री, तीन पूर्वप्रधानमन्त्री सहभागी भएको बैठकमा कुनै अप्रिय हुने स्थिति नै होइन । किनकि त्यो उच्चस्तरको बैठक थियो,’ स्रोतले भन्यो, ‘कुनै निर्णय गर्नभन्दा हिजोका फरक पक्ष बसेकोले सकेसम्म हार्दिक वातवरण बनाउनु बैठकको उद्देश्य थियो । निर्णय गर्नु थिएन बरु बाहिर देखाउन र हामी भेट्यौँ, शान्तितिर फर्कियौँ भन्नु थियो । यसैले प्रतिकात्मक रूपमा गरिएको बैठक मात्रै थियो ।’

यद्यपि जेन–जीले फालेको पुरानो र नयाँ सत्तापछिको एउटै सिटिङ प्रतिकात्मक मात्रै भएन । औपचारिक निर्णय नलिए पनि खुलेरै ठट्टाकै शैलीमा राजनीतिक विमर्श भएको स्रोत बताउँछ । राष्ट्रपति पौडेल दाहिनेतिर बस्दा प्रधानमन्त्री सुशीला कार्कीलाई देब्रेतिर आसनको व्यवस्था गरिएको थियो । कार्की बसेको साइडतिर प्रचण्ड बसे । तर हलको दाहिने लहरमा ओली देउवासँगै बसेको बाहिरिएको तस्वीरमा देख्न सकिन्छ ।

राष्ट्रपति पौडेलले ‘देशको परिस्थिति गम्भीर र संवेदनशील छ । यसको निकासको लागि नै चुनाव घोषणा भएको हो । चुनाव सफल पार्न गम्भीर भएर लाग्नु हामी सबैको दायित्व हो’ भनेपछि छलफलको औपचारिक सुरुवात भएको स्रोतले बतायो । पौडेलले दलहरूलाई ‘प्रधानमन्त्रीले चुनावको तयारी गर्नुभएको छ । तपाईंहरू पनि लाग्नुस्, तयारी गर्नुस्’ भनेपछि कार्कीसहितका नेताले आ–आफ्नो भनाइ राखेका थिए ।